Geskryf deur Ansja Ferreira, met kommentaar deur Rozanne Raath, vir Vrouekeur

Die vakansie is tyd om bestekopname van jou lewe te doen, terug te kyk na die jaar wat verby is en nuwe doelstellings vir jouself te stel. Maak die beste van jou vakansie en behou die vakansie gevoel die hele jaar deur met die volgende wenke.

Jy sien alreeds die hele jaar uit na jou langverwagte vakansie . Jy sien die meeste daarna uit om net weg te kom van jou alledaagse roetine, tyd saam met jou geliefdes te spandeer en om met jou voete in die seewater te staan. Jy arriveer by jou bestemming, pak jou tasse uit en begin vakansie hou. En tog, wanneer jy weer terug by die huis kom, voel dit vir jou of jy nooit werklik weg was nie.

Stres vorm deel van ons gejaagde daaglikse bestaan. Wanneer ‘n mens se langverdiende vakansie aanbreek, is dit vreemd hoe daar skielik nuwe vorms van stres opduik. Het ek alles ingepak? Wat gaan gebeur met my huis en diere wanneer ek weg is? Wat gaan gebeur as iets skeefloop by die vakansie of op die pad soontoe? Hierdie is alles vrae wat by mens opkom wanneer jy voorberei vir jou vakansie. Jy sal moet leer om jou werk agter te laat sodat jy kan ontlaai en jou tyd af te kan geniet. Andersins gaan jy net so gedaan en vol stres terugkom van jou vakansie.

Ontlaai in fases

Maak nie saak hoe mooi die natuurskoon of hoe heerlik die branders en watter heerlike vakansiestemming daar op die strand is nie, die realiteit is dat miljoene vakansiegangers net nie kan afskakel nie, al probeer hul hoe hard. “Sommige mense ontlaai vinnig terwyl ander veel langer neem en selfs daarmee sukkel, sê kenners. Die rede daarvoor word dalk in die menslike brein gevind.

‘n Breinstudie deur die Case Western Reserve Universiteit in Cleveland, Ohio, het bewys dat net soos wat dit energie verbruik om te dink, net so word energie verbruik deur ‘n gedagte te blokkeer.
“Miskien verklaar dit waarom dit so uitputtend is om te ontspan en aan niks te dink nie”, sê Dr. Daniela Calvetti, ‘n wiskundige en mede-outeur van die breinstudie. (Bron: MailOnline (www.dailymail.co.uk)

“Soos wat daar fases van rou is, is daar ook fases van ontspanning, sê Rozanne Raath, ‘n lewensafrigter van Bloemfontein.
“Wanneer mens ’n week of twee se verlof neem, moenie verwag om op dag een al te ontspan nie. Rozanne verduidelik dat mense baie verskil in hoe hulle afskakel en gee die volgende riglyne:

“Fase een: Verkeer breindood. Gaan kyk ’n lekker fliek, pak jou kaste reg en kry genoeg slaap in. Jou liggaam het dit dringend nodig.

Fase twee:
Hoekom eers op jou oudag ’n “bucket-list” (wenslysie) maak? Maak nou ’n lys van 50 dinge wat jou gelukkig maak. Eenvoudige dinge soos ’n drukkie van jou kind, ’n heerlike cappuccino, om blomme te kry of ’n heerlike stappie. Begin jouself bederf en doen dinge wat vir jou regtig baie lekker is. As jy heeljaar te besig was en nie ’n belangstelling of ’n stokperdjie het nie, gaan soek een. Google en lees op. Hierdie gaan jou gedagtes ook so aflei van jou gewone roetine dat jy stelselmatig sal begin ontspan.

Fase drie:
Ons almal se behoeftes verskil, maar luister na jou innerlike stem en gun jouself kwaliteit self-sorg tyd. Neem deel aan ’n avontuurlustige aktiwiteit, skep ’n rustige omgewing rondom jou of gaan na ’n plek met ‘n mooi uitsig. Fokus meer op jouself as op ander en gaar energie op. Dan sal jou aandag ten volle op die ontspanning aktiwiteite wees en nie op al die stressore by die huis nie.

Fase vier: Indien jy kwaliteit tyd met jouself spandeer het, gaan jy so vars wees sodat jou ander verhoudings weer vir jou pret, geluk en vreugde sal gee. Belê nou in ander om jou en versterk jou ondersteuningsraamwerk. Dan gaan jy weer gereed wees vir ’n nuwe jaar vol uitdagings.

Neem bestekopname van jou lewe.

Alexandra Massey, lewenstylgids en skrywer van Life’s A Beach: Keep That Holiday Feeling All Year Round, skryf in haar boek dat jy jou vakansie in twee gedeeltes moet verdeel. “Die eerste deel is waar jy moet ontspan en net laat gaan. Jou roetine word gebreek en jou denke word meer buigbaar. Jy is weg van jou lewe, so jy kan terugkyk en alles met ‘n nuwe perspektief sien – jou werk, waar jy leef, jou familie en vriende. Nou is dit die tyd om na jou lewe te kyk. Hoe kan jy beter balans in jou lewe inbring? “

“’n Paar dae voordat jy huis toe gaan, moet jy vooruitbeplanning doen en doelwitte stel vir dinge wat jy wil regstel of verander wanneer jy weer by die huis is. Teen die einde van jou vakansie moet jy ‘n lys van jou prioriteite opstel. Jy sal oplet dat jou prioriteite nou heelwat verskil van jou voriges” skryf Alexandra. (Bron: http://www.psychologies.co.uk)

“‘n Vakansie is ‘n geleentheid om jou lewe te beplan, weg van jou lewe”, sê kliniese sielkundige Dr. Cecilia d’Felice, skrywer van die boek 21 Days to A New You. (Bron: http://www.psychologies.co.uk). Wanneer jy uit jou alledaagse roetine weggeruk word en jouself in ‘n nuwe, ontspanne omgewing bevind, is dit makliker om ‘n bestekopname van jou lewe te neem en te beplan aan nuwe doelwitte en drome.

Dit is nou ‘n goeie tyd om oor jou lewe na te dink en te bepaal watter areas van jou lewe ongebalanseerd is. Identifiseer aspekte in jou lewe wat jou gelukkig en ongelukkig maak.

Ons lesers se wenke

Die see kan kalmte bring.
• “Die see is ons gunsteling vakansie plek. Die prag en die mag van die grote see is oorweldig mooi, sê Erika Brummer-Van Der Westhuizen (Vrouekeur leser wat in Engeland woon). Om op die strand te sit met jou tone in die sand en die see aan te staar. Dan voel jy hoe die kalmte oor jou spoel en al jou bekommernisse wegspoel. Die see het baie betekenisse. Hy kan romanties wees waar jy en jou geliefde hand aan hand kan loop en selfs hartjies in die sand teken vir mekaar. Dis pret om sandkastele te bou. Die see vertroos en bring kalmte na ‘n storm. Dit is ook die plek waar Gods almag teenwoordig is want Hy het dit gemaak”.
• Christine Hanekom hou van Groenriviermond. “Daar is niks en net jy die see en natuur. Ons Rotariers kamp elke jaar daar vanaf die dag wat die skool sluit in Des vir ‘n week voor ons uitmekaar gaan vir die Kersvakansie. Al ons kinders is ook maats, so ons sien hul net as hul honger is. Dit voel of ek ‘n maand gerus het as ons daar was.
• “Ons het ‘n vakansiehuis in Hartenbos en ek werk my elke jaar morsdood om die huis netjies te hou en om kos te maak vir my gesin, vertel *Lettie, ‘n ma van 3. “Dit het al selfs gebeur dat ek ‘n kilogram of twee verloor het gedurende my vakansie van al die harde werk en nie genoeg uitgerus het gedurende die vakansie nie. Ek het besluit tot hiertoe en nie verder nie. Of almal werk saam en help om die plek skoon te hou of ek gaan nie weer saam nie. My plan het gewerk, almal doen nou hul deel en nou hou ons almal heerlik saam vakansie”. Ek tref ook vooraf reëlings met my huishulp om te kom help met die baie wasgoed as ons terugkom van die vakansie af”, vertel Lettie.
• Mense wat daarvan hou om te beplan, kan Anco Gouws se raad volg: “Wanneer jy by jou vakansiebestemming aankom, kry brosjures van al die besienswaardighede en aktiwiteite beskikbaar. Neem jou begroting in ag wanneer jy jou aktiwiteite beplan en moenie vergeet om die plaaslike inwoners te vra nie. Hulle sal jou baie goeie raad kan gee”, sê Anco.
• As jy daarvan hou om meer spontaan te wees, kan jy Eugene Ferreira se raad volg. “Onthou dat die weer, klein kinders, jou energievlakke en jou bui ‘n rol speel. Kry vooraf inligting oor al die besienswaardighede en aktiwiteite, maar laat jou lei deur jou omstandighede”.
• Volg ‘n hoë volume dag op met ‘n lae volume dag. Wissel ‘n dag van hoë fisiese aktiwiteit en opwindende besoeke aan besienswaardighede af met ‘n rustige, sorgvrye dag. Jy moet tyd kry om te rus en om besig te wees. Om byvoorbeeld drie besige dae na mekaar te hê waarin ‘n verskeidenheid aktiwiteite of besoeke aan besienswaardighede ingeryg is, gaan jou so moeg maak dat jy naderhand nie meer lus vir enige aktiwiteit gaan nie of enigiets verder inneem nie. Jy moet tyd maak om te rus ook, is Tristan Gouws, wat onlangs Amsterdam en Skotland besoek het, se raad.
• As jy met jong kinders, kleuters en babas gaan vakansie hou, is dit noodsaaklik om die vakansieaktiwiteite rondom hulle aan te pas. Dit gaan dalk nodig wees om die kinders in die middag ‘n kansie te gee om ‘n middagslapie te geniet, veral as hulle die oggend geswem het is Charlene*, ma van drie jong kinders, se raad.
• Behalwe as jou werk dit vereis, moet jy geen e-posse lees en antwoord nie en geen werksoproepe beantwoord nie. Jy is met vakansie en sal daar genoegsame tyd na die vakansie wees om werksverwante sake te hanteer. Stel dit ook duidelik aan jou werksmense/kollegas dat jy nie beskikbaar sal wees nie bly by jou besluit. Verseker dat ‘n verantwoordelike persoon in jou plek beskikbaar is vir dringende sake, sê *Ferdi, ‘n SAPD-lid.
• Belê in ‘n volledige noodhulpkissie, sê *Hannelie, ma van vier. Dit behoort medikasie vir naarheid, diaree, koors, hoofpyn, verkoue en griep en sooibrand in te sluit. Weggooibare handskoene, pleisters, middels teen insekbyte behoort ook deel hiervan te vorm. Jy kan jou apteker vra om vir jou ‘n noodhulpkissie met al die belangrikste middels en benodighede saam te stel.

Onthou ook die volgende:
• Maak reeds ‘n paar weke voor die vakansie ‘n lysie van items wat jy moet inpak en begin betyds inpak en die nodige voorbereidings tref. Indien jy troeteldiere en huisplante het wat versorg moet word, is dit noodsaaklik om ook vroegtydig hiervoor reëlings te tref. Om op die laaste dag voor jou vakansie alles af te jaag, gaan jou in ‘n gespanne bui laat beland en die kanse is goed dat jy iets gaan vergeet.
• Onthou jou sonbrandmiddel. Velkanker en sonsteek is ‘n realiteit.
• Onthou om uit te vind of die drinkwater by jou vakansiebestemming veilig is. Indien nie, drink dan eerder gebottelde water.
• Sluit belangrike dokumente soos paspoorte en identiteitsdokumente toe in die kluis by jou vakansiebestemming.
• Tref voorsorg teen insekbyte soos spinnekop-en muskietbyte en verseker dat die muskietafweerder wat jy vir jou kinders gebruik, veilig is vir gebruik by kinders.
• As jy by die see vakansie hou, wees versigtig vir bloublasies, jellievisse, seekastaiings en seeanemone wat pynlike steekwonde kan veroorsaak. Indien jy deur een van hierdie getakel is, gaan dadelik na die naaste lewensreddingtoring vir raad en hulp. Lewensredders beveel aan dat jy asyn gebruik indien jy wel deur van bogenoemde gesteek is.
• Sorg dat jy swem waar daar haainette en lewensredders is. Moet ook nie gaan swem as jy alkohol gebruik het nie.
• Belê in ‘n goeie sonbril.
• Hou belangrike noodnommers byderhand.
• Waterveiligheid vir kinders is van groot belang. Jong kinders behoort nooit sonder toesig alleen gelaat te word by enige water nie, al kan hul reeds swem.
• Bly kalm en gefokus wanneer ‘n krisis opduik.
• Hou matigheid voor oë. Eet steeds gesond en onthou dat alkohol ook baie kilojoules bevat. As jy jou nou gaan vergryp aan al die lekker eetgoed, gaan jy later sukkel om van al die oortollige kilogamme ontslae te raak.
• Kry genoeg slaap. Om te probeer om alles in te pas en nooit te rus of te min te slaap, gaan nou uitput en jy gaan doodmoeg by die huis kom na jou vakansie.
• Lekker vakansie hou!

*skuilnaam

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: