Geskryf deur Ansja Ferreira, met kommentaar deur Rozanne Raath, vir Vrouekeur

‘n Vrou vertolk menige rolle in haar lewe. Sy sal meestal die eerste agtien jaar van haar lewe haar ouers tevrede probeer stel. Daarna probeer sy gewoonlik haar man, maat of kinders tevrede stel. Dit kan ‘n lang en moeilike proses wees om jouself te vind en jy sal moontlik met talle struikelblokke te doen kry voordat jy finaal by hierdie bestemming uitkom. Om jouself te vind is soos om ‘n reuse legkaart stukkie vir stukkie te bou. Daar is biljoene mense op die aarde en nie een van hulle is dieselfde nie. Elkeen het hul eie unieke eienskappe en elke lewensfase bied ‘n unieke uitdaging aan ‘n persoon. ‘n Ma is die hart en siel van ‘n huis.

Baiekeer sit ‘n ma soveel in haar huishouding en kinders in en raak later so besig met alles om haar dat sy later voel dat sy haarself en haar drome iewers langs die pad verloor het. Ma’s van verskillende ouderdomme en in verskillende omstandighede kan almal in hierdie toestand verval. Vir ‘n jong ma kan ‘n eerste baba ‘n geweldige aanpassing wees. Tuisteskeppers wat nie ‘n salaris verdien nie, maar die huishouding en kinders hanteer, voel dikwels waardeloos omdat hulle nie ‘n salaris ontvang nie. Tog is hulle heeldag besig en vervul meer as een rol en sal dit haar man duisende rande kos om iemand te betaal om al die werk te doen wat sy elke dag verrig. Ouer ma’s word op hul beurt dikwels deur die leë nes sindroom geraak.

‘n Lewensstylafrigter gee raad

“Indien ‘n mens ‘n definisie sou moes gee van “vind jouself of wie is ek?”, sal elke persoon se definisie verskil, sê Rozanne Raath, ‘n lewenstylafrigter van Bloemfontein. Sukses, vooruitgang en om die beste te wees in wat sy doen, kan dalk vir die een vrou van waarde en haar definisie van haarself wees. Vir iemand anders is dit dalk om te kan “cope” met haar kinders se vereistes, nog sexy te wees vir haar man en om die werk te doen waarvan sy baie hou, sê Rozanne.

Rozanne som dit kortliks op: “Indien jy in elke lewensfase die uitdagings met ‘n glimlag kan leer aandurf, jou selfwaarde behou, jou rolle definieer en dit dan bemeester, glo ek het jy jouself gevind. “Maar slegs vir ‘n wyle, want dan begin die volgende lewensfase en die hele proses weer van voor af. As jy kan besef dat daar verskriklik baie veranderlikes deurgaans in jou lewe gaan wees, is jy op die wenpad. Indien jy dan vir jou waardes kan vasmaak wat meer konstantes is, gaan jy deurgaans tevrede, rustig en gemotiveerd voel”, sê sy.

Rozanne beveel aan dat indien dit vir jou moontlik is, jy in jouself belê en professionele hulp verkry. “Gaan spreek ‘n voorligtingsielkundige of ‘n lewenstylafrigter wat sal verseker dat jy jou konstantes herken, verstaan en in plek hou. Konstantes is dinge soos persoonlikheid, geloof in iets of iemand groter as jy, wat jou belangrikste waardes is en jou unieke skemas of maniere van dink en prosesseer. Indien jy dan vir jou waardes kan vasmaak wat meer konstantes is, gaan jy deurgaans tevrede, rustig en gemotiveerd kan voel, sê Rozanne.

Vier maniere om jouself te vind

1. Vind jouself deur ander te help
“Die beste manier om jouself te vind is deur hulpverlening aan ander” het Mahatma Gandhi gesê.
Het jy die gevoel dat jy iets kortkom in jou lewe en dat daar ‘n leemte is wat jy nie kan verklaar nie. “Dit is net asof iets nie volkome was in my lewe nie”, vertel Rika, ‘n sakevrou. Ek het toevallig betrokke geraak by ‘n liefdadigheidsprojek waar behoeftige bejaardes gehelp word. “Dit is asof daar meer sin en betekenis in my lewe is vandat ek by hierdie projek betrokke geraak het. Ek het ‘n deel van myself ontdek wat ek nie geweet het bestaan nie”, sê Rika. Gee van jou tyd, ‘n oor om te luister aan iemand wat met jou wil praat, gee onnodige items in jou huis aan ‘n liefdadigheidsorganisasie. Jy kan ‘n verskil maak en boonop jouself ook help. In sy boek “The Hidden Gifts of Helping, skryf Dr. Stephen G. Post dat almal deur moeilike tye deurmaak, maar dat ons ons eie gesondheid en welstand kan verbeter en uiting kan gee aan ons eie identiteit en waardigheid as menslike weses deur hulpverlening aan ander. (Bron: http://www.stephengpost.com/hiddengifts)

2. Selfaanvaarding is die sleutel
Gee jouself toestemming om te wees wie jy is
*Carine (39 jaar) het in ‘n baie streng ouerhuis grootgeword. Haar pa was baie dominerend en het het vir Carine voorgeskryf hoe en wat sy moes doen, wat sy moes gaan studeer en het selfs vir haar probeer voorskryf met wie sy moes trou. Carine het op akademiese vlak uitstekend presteer. In matriek bring sy een dag trots haar rapport vir haar pa. “Pa, ek staan tweede in my klas, ek het 90% gekry!” Wie staan eerste in jou klas? En wie staan eerste in jou graad? “ was haar pa se enigste opmerking. “Jy sal moet ophou om so baie eet, jy is vet!” is haar ook gereeld toegesnou, al was haar gewig normaal vir haar ouderdom en liggaamstipe. Niks was ooit goed genoeg vir hom nie, al het sy hoe hard probeer. Carine het later anorexia nervosa ontwikkel, verhoudingsprobleme ondervind en gesukkel om mense te vertrou. ‘n Sielkundige het jare later die wortel van haar probleem gevind, sy wou haar pa tevrede stel en sy het verwerp gevoel deur haar hom. “Met die hulp van die sielkundige het ek uiteindelik besef dat ek nooit myself kon wees nie en dat ek altyd probeer het om my pa, my man, my kinderss en ander tevrede te stel. Na my egskeiding het ek by ‘n punt uitgekom wat ek myself uiteindelik leer ken het en ek het myself toestemming gegee om te wees wie ek is en toe doen wat ek wil, nie wat ander mense vir my voorgeskryf het nie, vertel Carine. Natuurlik het my pa nie daarvan gehou nie, maar ek was nou sterk genoeg om sy teenkanting te hanteer. Ek is nou vir die eerste keer in my lewe gelukkig”.

Carine noem dat sy drie belangrike lewenslesse geleer het:
a) Aanvaar terugslae en mislukkings as deel van jou leerproses en as deel van die groot plan in jou lewe.
b) Swaarkry maak jou sterker. Dikwels vind iemand hom of haarself wanneer hy/sy deur ‘n baie moeilike tyd gegaan het en swaargekry het.
c) Kom tot die besef dat jy nie almal rondom jou gaan tevrede stel nie en dat almal nie van jou gaan hou nie, al probeer jy hoe hard om almal rondom jou tevrede te stel.

“Here gee my kalmte om die dinge wat ek nie kan verander nie te aanvaar, moed om die dinge te verander wat ek kan en wysheid om die verskil te ken.” Reinhold Niebuhr (The Serenity Prayer)

3. Maak jouself los van die rolle wat jy vertolk
Maak tyd vir jouself en gaan na ‘n plek waar dit stil is. “Om in die natuur te kom, help my baie om myself te vind, sê *Jeanette, ‘n besige ma van vier. “Ek is nie net iemand se dogter, iemand se vrou en iemand se ma nie” “Ek is meer as net die rolle wat ek vertolk en ‘n bietjie alleentyd help my om daarby uit te kom”. Maak tyd vir jouself. ‘n Bietjie stilte rondom jou waarin jy net met jou eie gedagtes besig is doen wondere om ‘n mens perspektief op jou eie lewe te gee en met jouself te kommunikeer en jou batterye te herlaai. Pa, ouma of ‘n babaoppasser kan help en jou bietjie tyd gee vir jouself. Ontwikkel weer jou talente of die stokperdjie wat jy afgeskeep het. Dink kreatief aan maniere om geld van die huis af te verdien as jy nie buite die huis wil gaan werk nie. Maak jouself weer mooi, kleur jou hare ‘n ander kleur, koop nuwe grimering, sluit by ‘n oefenklas of dansklas aan. Ma’s met ouer kinders was vir jare moontlik so besig met hul kinders se doen en late en noudat hulle groot is en moontlik uit die huis uit is, is daar nou ‘n leemte en kan hul moontlik gedisorïenteerd en rigtingloos voel. Dit is jou juis die tyd in jou lewe om weer op jouself te fokus en miskien iets nuuts aan te pak. Jy het moontlik baie van jou eie belangstellings en stokperdjies opgeoffer om tyd te maak om jou kinders aandag te gee. Nou is weer die tyd om aan hierdie verlore stokperdjies en belangstellings aandag te gee.

4. Bemagtig jouself
Die dae is verby dat jy net jouself sal vind deur sommer net deur die mosies (“motions”) te gaan, sê Rozanne (lewensstylafrigter). “Kennis is mag. Lees boeke en neem deel aan konferensies wat jou behoeftes aanspreek op daardie stadium in jou lewe” beveel sy aan. Leer om onafhanklik te raak en dinge vir jouself te doen. Leer om vertroue in jou eie oordeel en besluitnemingsproses te kry. Neem verantwoordelikheid vir jou eie begroting, huishoudelike sake en toekomsplanne.

Leer jouself beter ken. Begin ‘n dagboek of joernaal en skryf die volgende neer:
1. Skryf jou lewensverhaal neer asof dit deur ‘n biografis vasgepen is. Skryf neer waar jy gebore is, van jou vroegste herinneringe, oor jou kinderjare, skooljare, mense wat ‘n belangrike invloed op jou gehad het, dinge wat jou bly gemaak het, dinge wat jou hartseer gemaak het.

2. Identifiseer wat vir jou belangrik is in die lewe – Is dit liefde, geld of jou familie? Wat is vir jou lekker om te doen? Wat maak jou gelukkig? Wat is jou swak eienskappe en wat is jou goeie eienskappe? Wil jy graag mooi wees vir ander? Is dit vir jou belangrik wat ander van jou dink?

3. Skryf jou gedagtes, idees en drome neer.
4. Wat het nog altyd in die pad van jou drome gestaan? Maak ‘n lys hiervan.
5. Skryf neer wat jou uniek en anders as ander maak.
6. Identifiseer die verskillende rolle wat jy in jou lewe speel byvoorbeeld kind, lewensmaat, ouer, werknemer, vriendin.

7. Maak ‘n lys van jou sterk eienskappe. Maak daarna ‘n lys van jou swak eienskappe.
8. Wat laat jou goed voel. Is dit musiek, die buitelewe, kuier met vriende?
9. Waar is jy nou in jou lewe? Is daar dinge wat jy graag anders wil hê? Skryf dit neer.
10. Wat sal jy moet doen of verander om die dinge wat jy graag in jou lewe wil hê te kan bekom of te bereik? Maak ‘n lys van dinge wat jy sal moet doen om dit te bereik.
11. Stel vir jouself doelstellings. Jy sal nou ‘n spesifieke datum moet kies waarop elke doelstelling bereik moet word en jouself voorneem om dit voor of op daardie datum te doen.

Dit is nooit te laat om jouself weer te vind nie. Jy sal ‘n gelukkiger persoon wees en jou kinders, eggenoot en vriende sal ook daarby baat.

*skuilnaam

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: